Vergi, Hüquq və Əmək Münasibətləri

TÜİB-in Vergi, Hüquq və Əmək Münasibətləri Komissiyası Azərbaycan və Türkiyə arasında biznes fəaliyyətinə təsir edən qanunvericilik dəyişikliklərini, vergi siyasətindəki yenilikləri və əmək münasibətlərinə dair normativ çərçivəni mütəmadi olaraq təhlil edir. Komissiya sahibkarlıq subyektlərinin fəaliyyətinə birbaşa təsir göstərən hüquqi və vergi mexanizmlərini araşdırır, onların tətbiqi, mövcud çətinliklər və inkişaf imkanları barədə müntəzəm şəkildə məlumatlar hazırlayır.

Azərbaycanın vergi və hüquq sistemində son illər həyata keçirilən islahatlar biznes mühitinin daha şəffaf və əlçatan olmasına şərait yaradıb. Bu kontekstdə Komissiya vergi yükünün optimallaşdırılması, qeydiyyat və lisenziyalaşdırma prosedurlarının sadələşdirilməsi, elektron xidmətlərin tətbiqi kimi istiqamətlər üzrə yenilikləri təqib edir.

Əmək münasibətləri üzrə, Komissiya əmək qanunvericiliyi, işçi-işəgötürən münasibətlərinin tənzimlənməsi, əmək müqavilələrinin tətbiqi və rəqəmsal əmək platformalarının yaradılması sahəsində baş verən yenilikləri araşdırır. Eyni zamanda iki ölkə arasında əmək miqrasiyası, mütəxəssis mübadiləsi və əmək bazarındakı trendlərin biznes subyektlərinə təsiri haqqında təhlillər aparır.

Komissiya həmçinin Türkiyə və digər ölkələrin qabaqcıl hüquqi və vergi təcrübələrini izləyir, onların Azərbaycan biznes mühitinə tətbiqi imkanlarını qiymətləndirir. Baş verən dəyişikliklər, normativ yeniliklər və praktiki tətbiq mexanizmləri barədə TÜİB üzvlərini məlumatlandırır, maarifləndirici təqdimatlar və təhlil icmalları hazırlayır.