“Qardaş Ailə” layihəsi çərçivəsində Türkiyədən gələn şəhid ailələri Qarabağda!

“Qardaş Ailə” layihəsi çərçivəsində Azərbaycan Respublikası Müdafiə Nazirliyi və Türkiyə-Azərbaycan İş Adamları və Sənayeçiləri İctimai Birliyinin (TÜİB) təşkilatçılığı ilə ölkəmizdə səfərdə olan Türkiyənin Bursa şəhərindən olan bir qrup şəhid ailəsi Tərtər rayonuna səfər edib. Tərtər Rayon İcra Hakimiyyətinin başçısı Müstəqim Məmmədov tərəfindən qarşılanan qonaqlara qədim tarixə malik Azərbaycanla Türkiyə dövlətləri arasında dostluq və qardaşlıq əlaqələrindən, əsrlər boyu Azərbaycan və türk xalqlarının həmişə bir-birinə dəstək olduğu, sıx əməkdaşlıq etdiyi barədə danışılıb. 44 günlük Vətən müharibəsində rayona dəymiş ziyan haqqında məlumat verilib. Qonaqlar səfər çərçivəsində Dövlət Rəmizləri Muzeyində, Vətən müharibəsində erməni separatçıları tərəfindən atılan “Smerç” raketi nəticəsində dagıdılmış açıq havada fəaliyyət göstərən ev muzeyində olub, Vətən müharibəsi zamanı erməni silahlı qüvvələri tərəfindən Tərtərə atılmış qadağan olunmuş raketlərin qalıqlarına baxıb, rayonun infrastrukturuna dəymiş ziyanı əks etdirən fotostendlərlə tanış olublar. Şıxarx qəsəbəsi ərazisində şəhidlərin xatirəsinə salınmış “Vətən bağında” qəhrəman şəhid oğullarının və “Pençe-Kilit” antiterror əməliyyatı bölgəsində terror təşkilatı üzvlərinin atəşi nəticəsində həyatını itirən şəhidlərin xatirəsinə ağac əkilib. Səfər çərçivəsində Tərtər rayonunun Suqovuşan qəsəbəsi və Talış kəndi ziyarət edilib. Uzun illərdən sonra doğma torpaqlarında-Talış bölgəsində məskunlaşan ailənin qonağı olan şəhid ailələri isti münasibətlə qarşılanıb. Həmçinin Tərtərin N saylı hərbi hissəsini ziyarət edən qonaqlar, əsgərlər tərəfindən təmtəraqlı şəkildə qarşılanıb, onlarla yaxından tanış olub və axşam yeməyi birlikdə edilib. Korpus komandiri general-mayor Bilal Çompuzov qonaqlara təşəkkürünü bildirib. Qeyd edib ki, keçirilən tədbirin əsas məqsədi hər iki dövlətin şəhid ailələri arasında münasibətlərin qurulmasını təmin etmək və mövcud əlaqələri daha da möhkəmləndirməkdir.