Xocalı soyqırımına həsr edilmiş film təqdim edilib

Azərbaycan İş Adamları və Sənayeçilər İctimai Birliyinin (TUİB) rəhbərliyi Xocalı soyqırımının 25 illiyinə həsr edilmiş «Kağız Qəbir» filminin təqdimatında iştirak edib. Təqdimat mərasimi fevralın 17-də Bakının Nizami film mərkəzində keçirilib.

Xocalı dəhşətlərindən bəhs edən adı çəkilən film Türkiyə Elm və Ədəbiyyat Əsəri Sahibləri Məslək Birliyi (İLESAM) təşkilatının dəstəyi ilə çəkilib.

Film təqdimatında Türkiyənin Azərbaycandakı fövqəladə və səlahiyyətli səfiri Erkan Özoral, İLESAM-ın baş direktoru Mehmet Nuri Parmaksız, TUİB-in idarə heyətinin sədri Əli İshan Gənç, TUİB İdarə Heyətinin Sədrinin 1-ci Muavini Hüseyin Büyükfırat, Azərbaycan Yazıçılar Birliyinin rəhbəri Anar, ictimaiyət nümayəndələri və digər qonaqlar iştirak edib.

Çıxış edənlər 1992-ci ilin fevralın 26-da baş vermiş Xocalı soyqırımının dünya tarixində ən böyük qətliamlardan biri olduğunu, bu hadisələrin erməni vəhşiliyini bir daha sübut etdiyini bildiriblər.
O cümlədən İLESAM rəhbəri Mehmet Nuri Parmaksız bildirib ki, «Kağız Qəbir» filmi, etmənilərin bütün dünyanı aldatmağa çalışdığı, «türklər 1-ci Dünya müharibəsində bizə soyqırım edib» yalanlarını ifşa edən, əksinə, ermənilərin 1992-ci ildə azərbaycanlılalara qarşı soyqırım törətdiyini nümayiş etdirir. «Biz İLESAM olarak bu cevabı Kâğıt Kabir filmi ile Ermenilere verdik».-deyə təşkilat rəhbəri bildirib.