Bakıda keçiriləcək “Şanlıurfa Günləri” ilə bağlı mətbuat konfransı keçirilib.

5–6 sentyabr tarixlərində Bakıda keçiriləcək “Şanlıurfa Günləri” ilə bağlı mətbuat konfransı təşkil olunub. Tədbirin əsas məqsədi Şanlıurfanın qədim tarixinin, zəngin mədəni irsinin, ənənələrinin, musiqisinin, mətbəxinin və turizm potensialının Azərbaycan ictimaiyyətinə daha yaxından tanıdılmasıdır.

Mətbuat konfransında Şanlıurfa Böyükşəhər Bələdiyyəsinin sədri Mehmet Kasım Gülpınar, Yunus Emre İnstitutu sədrinin müavini Ömer Yıldız, İçərişəhər Dövlət Tarix-Memarlıq Qoruğu İdarəsi İdarə Heyəti sədrinin müavini Rəna Nəsirova Mustafayeva, Türkiyə-Azərbaycan İş Adamları və Sənayeçilər Birliyinin (TÜİB) sədri Hüseyin Büyükfırat və Samsat Bələdiyyəsinin sədri Halil Fırat iştirak ediblər.

Konfrans zamanı Şanlıurfanın minilliklər ərzində formalaşmış tarixi və mədəni kimliyi, bölgənin turizm imkanları və UNESCO çərçivəsində tanınan musiqi irsi haqqında məlumat verilib. Çıxışlarda Şanlıurfanın tarixi və mədəni dəyərlərinin Bakıda təqdim edilməsinin Azərbaycan və Türkiyə arasında mövcud olan qardaşlıq münasibətlərinin mədəni sahədə daha da möhkəmləndirilməsi baxımından əhəmiyyəti vurğulanıb.

Tədbirdə qeyd olunub ki, “Şanlıurfa Günləri” yalnız şəhərin tanıdılması ilə məhdudlaşmır, eyni zamanda Azərbaycan və Türkiyə arasında qarşılıqlı mədəni əlaqələrin genişləndirilməsi, xalqların ortaq dəyərlərinin ön plana çıxarılması və yeni əməkdaşlıq imkanlarının təşviqi baxımından mühüm platforma rolunu oynayır.

“Şanlıurfa Günləri” çərçivəsində şəhərin tarixi və mədəni irsini əks etdirən foto sərgisi, ənənəvi sənət nümunələrinin təqdimatı, musiqi və folklor proqramları, eləcə də Şanlıurfa mətbəxinin özünəməxsus nümunələrinin tanıdılması nəzərdə tutulur. Ziyarətçilər tədbir boyunca Şanlıurfanın tarixi məkanları, adət-ənənələri, sənət və musiqi mədəniyyəti ilə daha yaxından tanış olmaq imkanı əldə edəcəklər.

Şanlıurfanın mədəniyyət və turizm potensialının Bakıda təqdim olunması şəhərin beynəlxalq səviyyədə tanıdılması ilə yanaşı, iki qardaş ölkə arasında turizm, mədəniyyət və digər sahələrdə əlaqələrin inkişafına da töhfə verəcək.

“Şanlıurfa Günləri” 5–6 sentyabr tarixlərində Bakının İçərişəhər ərazisində, Qoşa Qala qapısı qarşısında keçiriləcək. Tədbir proqramı ictimaiyyət üçün açıqdır və iştirak ödənişsizdir.

Tarix: 5–6 sentyabr
Məkan: İçərişəhər, Qoşa Qala qapısı
Giriş: Sərbəst