“Türkiyə–Azərbaycan Ticarət Nümayəndə Heyəti və B2B Görüşləri” tədbiri keçirilib.

Bakıda Türkiyə İxracatçılar Assambleyası (TİM)-in təşkilatçılığı, Kiçik və Orta Biznesin İnkişafı Agentliyi (KOBİA) və Azərbaycan Respublikasının İxracın və İnvestisiyaların Təşviqi Agentliyi – AZPROMO-nun əməkdaşlığı, Türkiyə–Azərbaycan İş Adamları və Sənayeçiləri İctimai Birliyi-in tərəfdaşlığı ilə “Türkiyə–Azərbaycan Ticarət Nümayəndə Heyəti və B2B Görüşləri” tədbiri keçirilib.

Tədbirin əsas məqsədi Azərbaycan və Türkiyə iş adamları arasında birbaşa əlaqələrin qurulmasına, yeni tərəfdaşlıqların formalaşdırılmasına və qarşılıqlı ticarət dövriyyəsinin artırılmasına dəstək olmaqdır.

Tədbirdə çıxış edən TİM-in prezidenti Mustafa Gültepe, KOBİA-nın İdarə Heyətinin sədri Orxan Məmmədov, AZPROMO-nun icraçı direktorunun müşaviri Şəbnəm Allahverdiyeva və Türkiyənin Azərbaycandakı fövqəladə və səlahiyyətli səfiri Birol Akgün iki ölkə arasında “Bir millət, iki dövlət” prinsipi əsasında qurulmuş strateji əməkdaşlığın iqtisadi sahədə daha da genişləndirilməsi imkanlarından bəhs ediblər.

Tədbir çərçivəsində təşkil olunan B2B görüşlərdə müxtəlif sektorları təmsil edən şirkətlər arasında məhsul və xidmətlər üzrə təqdimatlar keçirilib, potensial əməkdaşlıq imkanları müzakirə olunub.

Eyni zamanda, TÜİB üzvləri də tədbirdə fəal iştirak edərək B2B görüşlərə qatılıblar. TÜİB-in sədri Hüseyin Büyükfırat Türkiyədən gələn şirkət nümayəndələri ilə bir sıra görüşlər keçirərək yeni əməkdaşlıq perspektivlərini müzakirə edib, təşkilatlararası işbirliyinin genişləndirilməsinin əhəmiyyətini vurğulayıb.

Türkiyə nümayəndə heyətinin Bakıya səfəri çərçivəsində yerli şirkət və qurumlara ziyarətlər, eləcə də bazar araşdırması tədbirləri də nəzərdə tutulur. Bu təşəbbüslər Azərbaycan bazarının imkanlarının yerində qiymətləndirilməsinə və konkret əməkdaşlıq mexanizmlərinin formalaşdırılmasına xidmət edir.